जुन्नरच्या हापूसला मिळणार नवी ओळख; खासदार डॉ. कोल्हे यांच्या प्रयत्नांना यश

जुन्नर दि.६:-नारायणगाव जुन्नरच्या शिवनेरी हापूस आंब्याला जीआय मानांकन मिळावे यासाठी नारायणगावच्या ग्रामोन्नती मंडळ कृषी विज्ञान केंद्राचे प्रयत्न आणि खासदार डॉ. अमोल कोल्हे यांचा सातत्यपूर्ण पाठपुराव्याला यश आले असून केंद्र सरकारने शिवनेरी हापूस आंब्याला जीआय मानांकन देण्याचा प्रस्ताव मानांकन समितीने स्वीकारला आहे.जुन्नर तालुक्यात आंबा उत्पादन मोठ्या प्रमाणावर घेतले जाते. हा हापूस आंबा वैशिष्ट्यपूर्ण चवीसाठी ओळखला जातो. त्यामुळे जुन्नरच्या हापूस आंब्याला शिवनेरी हापूस म्हणून जीआय मानांकन मिळावे यासाठी नारायणगावच्या ग्रामोन्नती मंडळ कृषी विज्ञान केंद्र प्रयाशील होते. शिवनेरी हापूस आंब्याला जीआय मानांकन मिळावा.यासाठी खासदार डॉ. कोल्हे सन २०२२ पासून सातत्याने पाठपुरावा करीत होते. या प्रयत्नांना यश मिळाले असून जशी काश्मिरी केशर, बनारसी साडी किंवा दार्जिलिंग चहा या धर्तीवर जुन्नर तालुक्यातील आंब्याला शिवनेरी हापूस आंबा अशी ओळख मिळावी. यासाठी जीआय मानांकन समितीने प्रस्ताव स्वीकारला असून त्यावर हरकती न आल्यास मान्यतेबाबत निर्णय होईल; मात्र हरकती आल्यास त्याची सुनावणी घेण्यात येणार आहे. त्यामुळे आंबा उत्पादक शेतकऱ्यांमध्ये उत्साही वातावरण निर्माण झाले आहे.या संदर्भात खासदार डॉ. कोल्हे म्हणाले की, जुन्नरच्या शिवनेरी हापूस आंब्याला जीआय मानांकन मिळावे यासाठी ग्रामोन्नती मंडळ कृषी विज्ञान केंद्राचे गेल्या अनेक वर्षांपासून प्रयत्न सुरू होते. त्यानुसार वेळोवेळी प्रस्तावातील त्रुटींची पूर्तता कृषी विज्ञान केंद्राच्या माध्यमातून करण्यात आली. त्यामुळे या भागाचा लोकप्रतिनिधी खासदार म्हणून केंद्रीय वाणिज्यमंत्री पियुष गोयल यांच्याकडे पत्रव्यवहार व पाठपुरावा करीत होतो. आता शिवनेरी हापूसला जीआय मानांकन प्रस्ताव समितीने स्वीकारली आहे. उपमुख्यमंत्री अजित पवार व माजी आमदार अतुल बेनके यांचेही याकामी सहकार्य मिळाले, त्यांनाही मनापासून धन्यवाद देतो, अशी प्रतिक्रिया खासदार डॉ. कोल्हे यांनी दिली.