लायन्स क्लब नारायणगाव कडून बांगरवाडी च्या मोरांना १००० किलो धान्य

बेल्हे दि.२६:- बांगरवाडी (ता. जुन्नर) गावात २५० ते ३०० मोर असल्याने दुष्काळाचे सावट पाहता या मोरांना खाद्य व पाण्याची टंचाई जाणवत होती. ही गरज ओळखून लायन्स क्लब नारायणगाव यांच्या कडून १००० किलो धान्ये रविवार दि.२६ रोजी उपलब्ध झाले.

तर या आधी विघ्नहर साखर कारखान्याचे शेतकी अधिकारी गाडेकर यांनी ५० किलो तांदूळ दिला. गांजवे सर यांनी ११ हजार रुपये मदत, प्रभाकर बांगर १००१, रोटरी क्लब ऑफ आळेफाटा सेंट्रलच्या वतीने २०० किलो मका या मोरांसाठी देण्यात आले तसेच पाण्याचा टँकरही देण्यात आला.

तसेच राजुरी गावचे बबन हाडवळे यांनी या मोरांसाठी १०० किलो गहू व पाण्याचे ब्यालर पुरवले. तसेच बऱ्याच दात्यानी ५० – ६० किलो धान्य दिले. जुन्नर तालुक्याच्या पूर्व भागात दुष्काळी परिस्थिती असल्यामुळे वन्य प्राण्यांना व मोरांचा चारा पाण्याचा गंभीर प्रश्न निर्माण झाला आहे.

मोरांना मदतीचा हात मिळाल्यामुळे तात्पुरता खाद्य व पाण्याचा प्रश्न मिटला आहे. ग्रामस्थ व पशु मित्रांनी या ठिकाणी पाणवठे तयार केले असून खाद्य ही आत्तापर्यंत पुरवले आहे.

परंतु हे पानवठे व खाद्य दिवसेंदिवस कमी पडत असून मोरांना गहू, ज्वारी,बाजरी,तांदूळ व इतर धान्य दानशूर व्यक्तींनी द्यावे असे आवाहन पक्षी मित्र नारायण सावंत तसेच सामाजिक कार्यकर्ते महेंद्र बांगर यांनी केले आहे.

या प्रसंगी जिल्हा परीषदेचे अभियंता वनवे, लायन्स क्लबचे जितेंद्र गुंजाळ, मस्करे, सह्याद्री भिसे, शिरीष जठार, संजय शिंदे, शशिकांत वाजगे, गणेश डुंबरे, बाळशिराम बांगर, स्वप्निल बांगर, गजानन फराटे , नकाजी बुवा बांगर,  अनिकेत बांगर, कैलास औटी व ग्रामस्थ उपस्थित होते.