समर्थ संकुलामध्ये आंतरराष्ट्रीय योग दिन संपन्न

बेल्हे दि.२१:- समर्थ ग्रुप ऑफ इन्स्टिट्युशन्स बेल्हे (बांगरवाडी) येथील शैक्षणिक संकुलात आंतरराष्ट्रीय योग दिनानिमित्त संकुलातील इंजिनिअरिंग, पॉलिटेक्निक, फार्मसी, बी सी एस, बी बी ए,ज्युनियर कॉलेज, गुरुकुल या विभागातील शिक्षक व १ हजार विद्यार्थ्यांनी योगाचे धडे घेतले.

योग प्रशिक्षक डॉ.राजाभाऊ ढोबळे यांच्या मार्गदर्शनाखाली सूर्यनमस्कार, योगासने, प्राणायाम, ध्यान व प्रार्थना, हास्यासन, सुखासन,गरुडासन,ताडासन,शीर्षासन,धनुरासन,वज्रासन,भुजंगासन,कपालभाती,भसरिका,अनुलोभ विलोभ आदीचे प्रात्यक्षिके सादर करण्यात आली.

वेगवेगळ्या प्रकारच्या दुर्धर व्याधी योगासनामुळे नष्ट होण्यास मदत होते. योग हि एक साधना असून सातत्यपूर्ण सरावाने मनुष्याच्या जीवनात चांगल्या प्रकारचे अमुलाग्र बदल होऊ शकतात. योगामुळे स्मरणशक्ती वाढण्यास मदत होते. शरीरातील रक्त प्रवाह सुरळीत होण्यास मदत होते तसेच प्राणायाम केल्यामुळे श्वसनाचे विकार बरे होण्यास मदत होते.गुडगे दुखी,पाठ दुखी,कंबर दुखी या पासून आराम मिळतो. योग साधनेचे महत्व सांगताना प्रा.प्रदीप गाडेकर म्हणाले की,योग ही शारीरिक आणि मानसिक आरोग्यासाठी आचरणात आणली जाणारी प्राचीन भारतीय प्रक्रियापद्धती आहे. यम, नियम, योगासन, प्राणायाम, प्रत्याहार, धारणा, ध्यान आणि समाधी ही योगाची आठ अंगे आहेत.

प्राणायामामुळे शरीर व मन शुद्ध होऊन मनाची एकाग्रता वाढते. अतिरिक्त चरबी कमी करण्यास मदत होते.ध्यानधारणे मुळे मनाला शांती मिळण्यास मदत होते.नियमित वज्रासनामुळे व प्राणायाम,कपालभाती,भसरीका केल्याने आजारापासून बचाव होतो.

यावेळी समर्थ बी सी एस चे प्राचार्य डॉ.उत्तम शेलार, डॉ.लक्ष्मण घोलप, समर्थ पॉलिटेक्निक चे प्राचार्य प्रा.अनिल कपिले, ज्युनियर च्या प्राचार्या वैशाली आहेर,गुरुकुल चे प्राचार्य सतीश कुऱ्हे,फार्मसी चे प्राचार्य डॉ.संतोष घुले, डॉ.बसवराज हातपक्की, प्रशासकीय अधिकारी प्रा. प्रदिप गाडेकर आदी मान्यवर उपस्थित होते.कार्यक्रमाचे क्रीडा शिक्षक डॉ.राजाभाऊ ढोबळे,प्रा.किरण वाघ,डॉ.ज्ञानेश्वर जाधव यांनी केले.