मुंबई महापालिका निवडणुकीआधी मनसे अ‍ॅक्शन मोडवर;संदीप देशपांडे वर मुंबई अध्यक्षपदाची जबाबदारी

मुंबई दि.२३:- मुंबई महानगरपालिकेच्या निवडणुकीच्या घोषणेची शक्यता व्यक्त केली जात आहे. यासाठी महाराष्ट्र नवनिर्माण सेना तयारीला लागली आहे.

महापालिका निवडणुकीच्या पार्श्वभुमीवर मुंबईत मनसेच्या नव्या पदांच्या रचनेची घोषणा करण्यात आली आहे. मनसे अध्यक्ष राज ठाकरे यांनी याबाबत महत्त्वाची घोषणा केली आहे. विधानसभा आणि लोकसभा निवडणुकीतील अपयशानंतर महापालिका निवडणुकीसाठी राज ठाकरे कामाला लागले आहेत. अद्याप मुंबई महापालिकेची घोषणा झालेली नाही, तरी पक्ष संघटना आणि बळकटीसाठी मनसे अधिक लक्ष देत असल्याचं दिसतं आहे.कोणत्याही निवडणुकीसाठी पक्षबांधणी आणि संघटना महत्त्वाची भूमिका निभावते. त्यामुळे निवडणुकीपूर्वी मनसेकडून कामाचं वाटप करण्यात आलं आहे.

मुंबई महानगरपालिका निवडणुकीसाठी मनसेचे संदीप देशपांडे यांच्यावर मोठी जबाबदारी सोपवण्यात आली आहे. देशपांडे यांची मनसे मुंबई अध्यक्षपदी निवड करण्यात आली आहे. संंदीप देशपांडे यांनी मुंबईतील मराठीच्या मुद्दावरुन थेट भूमिका घेतली आहे. त्यामुळे यंदाच्या निवडणुकीत मनसे मराठी विरुद्ध अमराठी वाद अग्रणी ठेवण्याची शक्यता आहे. संदीप देशपांडे यांच्यानंतर ३ उपाध्यक्ष असणार आहेत.

कुलाबा ते माहीम-शीवपर्यंतची जबाबदारी उपाध्यक्ष यशवंत किल्लेदार, पश्चिम उपनगरची जबाबदारी शहर उपाध्यक्ष कुणाल माहिमकर, शहर उपाध्यक्षपदी असलेल्या योगेश सावंत यांच्याकडे पूर्व उपनगरची जबाबदारी असणार आहे. उपाध्यक्षांनंतर विभाग अध्यक्ष असणार आहेत. मनसेने आतापर्यंत मुंबईसाठी कधीही अध्यक्षांची नेमणूक केली नव्हती. आता मात्र थेट पहिल्यांदाच मुंबई अध्यक्षाची नियुक्ती करण्यात आली आहे. त्याशिवाय मुंबईतील विभाग अध्यक्ष यांच्यावर नियंत्रण ठेवण्यासाठी केंद्रीय समिती यांचे नेतृत्व नितीन सरदेसाई करणार आहेत. विधानसभा निवडणुकीत अपयश आलेल्या अमित ठाकरेंकडे मनसेने शाखाध्यक्षांची जबाबदारी सोपवली आहे. याशिवाय गटाध्यक्ष केंद्रीय समिती निवड बाळा नांदगावकर यांच्याकडे जबाबदारी सोपवण्यात आली आहे.