३१ डिसेंबरला साईमंदिर रात्रभर खुले राहणार
1 min read
शिर्डी दि.२३:- श्री साईबाबा संस्‍थान विश्‍वस्‍तव्‍यवस्‍था, शिर्डीतर्फे नाताळ सुट्टी, चालू वर्षाला निरोप व नवीन वर्षाचे स्‍वागतानिमित्त शिर्डी महोत्‍सवाचे आयोजन करण्‍यात आले आहे. या काळात श्री साईबाबांच्‍या दर्शनासाठी शिर्डीत होणारी संभाव्‍य गर्दी लक्षात घेवून समाधी मंदिर मंगळवारी (ता.३१) रात्रभर खुले ठेवण्‍यात येणार आहे. 
त्‍यामुळे ३१ डिसेंबरची शेजारती व १ जानेवारी २०२५ रोजीची पहाटेची काकड आरती होणार नाही, अशी माहिती संस्‍थानचे प्रभारी मुख्‍य कार्यकारी अधिकारी बाळासाहेब कोळेकर यांनी दिली.नाताळ व नवर्षाच्‍या सुट्टीच्‍या गर्दीमुळे बुधवारी २५ डिसेंबर ते १ जानेवारी २०२५ पर्यंत सात दिवस वाहन पूजा बंद राहतील. 
मात्र, नाताळ सुट्टीचे कालावधीत श्री साईसत्‍यव्रत पूजा, अभिषेक पूजा सुरु राहील, याची सर्व साईभक्‍तांनी नोंद घ्‍यावी. सुरक्षिततेच्‍या दृष्‍टीने शिस्‍तीचे पालन करण्‍याचे आवाहनही कोळेकर यांनी केले.
