सोलापूरचा शेतकरी नारळ शेतीत यशस्वी! १४५ झाडातून मिळवला ५ लाखांचा नफा

मोहोळ दि.२६:- सोलापूर जिल्ह्यातील मोहोळ तालुक्यात ६० वर्षीय विष्णू तुकाराम ननवरे यांनी कोरडवाहू भागात यशस्वीपणे नारळाची बाग फुलवून सर्वांचे लक्ष वेधून घेतले आहे. कुरुल गावातील या मेहनती शेतकऱ्याने आधुनिक शेती तंत्रज्ञान आणि योग्य नियोजनाच्या मदतीने अवघ्या एका एकरात नारळाचे उत्पादन घेत मोठे यश मिळवले आहे. सामान्यतः नारळ शेती ही कोकण भागासाठी ओळखली जाते, कारण तेथील हवामान आणि जमिनीची परिस्थिती यासाठी अनुकूल असते. त्यांची बाग आणि शेती पद्धती पंचक्रोशीत चर्चेचा विषय ठरली असून अनेक शेतकरी त्यांच्याकडून प्रेरणा घेत आहेत.सोलापूर जिल्ह्यासारख्या कोरडवाहू भागातही योग्य नियोजन आणि आधुनिक तंत्रज्ञानाच्या मदतीने पारंपरिक पिकांव्यतिरिक्त शेती करता येते, हे विष्णू ननवरे यांनी सिद्ध केले आहे. कमी खर्च, उच्च उत्पादन आणि पूरक पिकांची योग्य निवड यामुळे त्यांनी शेतीतील नफा वाढवला आहे. त्यांच्या यशाने परिसरातील अनेक शेतकरी प्रेरित झाले असून नारळ शेतीकडे वळण्याचा विचार करत आहेत. पारंपरिक शेतीत नफा कमी असल्याच्या काळात, योग्य संशोधन आणि आधुनिक तंत्रज्ञानाचा अवलंब करून शेती अधिक फायदेशीर कशी बनवता येते, याचे हे उत्तम उदाहरण आहे.

◆कोरडवाहू हवामानात केली नारळाची लागवड

विष्णू ननवरे यांचे शिक्षण १९६९ मध्ये अकरावीपर्यंत झाले असले तरी शेतीत त्यांनी प्रगत तंत्रज्ञानाचा प्रभावी वापर केला आहे. अत्यंत कोरड्या हवामानात त्यांनी तज्ज्ञांच्या सल्ल्याने १५x१५ फूट अंतरावर १४५ नारळाची झाडे लावली आहेत. या झाडांना भरपूर नारळ लागतात आणि त्यांची उंची मर्यादित असल्याने तोडणीसाठी फारसे श्रम लागत नाहीत. या संपूर्ण बाग उभारण्यासाठी त्यांना सुमारे ७० ते ७५ हजार रुपये खर्च आला. पारंपरिक नारळाच्या झाडांपेक्षा ही बुटकी जात अधिक उत्पादनक्षम असल्यामुळे त्यांना एका झाडामागे १०० हून अधिक नारळांचे उत्पादन मिळत आहे.

◆आंतरपीक पद्धतीचा केला अवलंब

नारळ शेतीसोबतच त्यांनी अधिक फायदा मिळवण्यासाठी आंतरपीक म्हणून कांदा आणि मेथीची लागवड केली. या पूरक शेतीमुळे त्यांना अवघ्या दोन वर्षांत दोन लाख रुपयांचे अतिरिक्त उत्पन्न मिळाले. याशिवाय, नारळ विक्रीतूनही त्यांना चांगला नफा होत आहे. सध्या ३० रुपये प्रति नारळ या दराने विक्री होत असल्यामुळे एका झाडामागे दरवर्षी ५,००० ते ६,००० रुपयांचे उत्पन्न मिळत आहे. त्यामुळे १४५ झाडांमधून त्यांना दरवर्षी ४ ते ५ लाख रुपये कमाई होते. कमी खर्च, उच्च उत्पादन आणि सहज तोडणी यामुळे ही शेती अधिक फायदेशीर ठरत आहे.