नळवणे येथे श्री कुलस्वामी खंडेरायाच्या नवीन मूर्तीची प्रतिष्ठापना

आणे दि.११:- नळवणे (ता.जुन्नर) येथील श्री कुलस्वामी खंडेराय देवाच्या मंदिरात नवीन मूर्तीची प्रतिष्ठापना करण्यात आली. या निमित्त गडावर दोन दिवस विविध धार्मिक कार्यक्रमांचे आयोजन करण्यात आले होते.

रविवारी (दि.९) सकाळी श्री कुलस्वामी खंडेराया, म्हाळसादेवी, बानाई देवी, दोन अश्व, गोमाता व कासव या नवीन मूर्तीची भव्य मिरवणूक काढण्यात आली. त्यानंतर गणेशपूजन, मातृकापूजन, पुण्याहवाचन आदी धार्मिक विधी संपन्न झाला. सोमवारी (दि.१०) सकाळी रूद्र स्वाहाकार यज्ञ संपन्न झाला. त्यानंतर स्वामी अनंत महाराज घोष (मौनी बाबा) व हभप. तुळशीराम महाराज सरकटे यांच्या शुभ हस्ते सर्व मूर्तीची प्रतिष्ठापना करण्यात आली. त्यानंतर बाल कीर्तनकार हभप. माऊली महाराज यांचे सुश्राव्य हरिकिर्तन संपन्न झाले.यावेळी गेले दोन दिवस भाविकांनी मोठी गर्दी केली होती. मोठ्या उत्साहात हा कार्यक्रम संपन्न झाला.

शालेय विद्यार्थ्यांनी आनंदाने कार्यक्रमांमध्ये सहभागी होऊन ढोल लेझीमच्या तालावर पालखी सोहळ्यात उपस्थित लावली. अशी माहिती कुलस्वामी खंडेराया देवस्थान ट्रस्टचे अध्यक्ष बाळासाहेब गगे यांनी दिली. या वेळी आमदार शरद सोनवणे यांची ग्रामस्थांनी आमदार पदी निवडून आल्या बद्दल गडावर खोबऱ्याची तुला करून त्यांचा नागरी सन्मान करण्यात आला.