साईचरणी १३ लाखांचा हार अर्पण
1 min read
शिर्डी दि.२:- श्री साईबाबांवर देश विदेशातील लाखो भक्‍तांची श्रद्धा आहे. याच श्रद्धेपोटी भाविक साईबाबांच्या झोळीत भरभरून दान देत असतात. नववर्षाच्‍या निमित्‍ताने मुळचे जम्‍मू काश्मीर येथील परंतू सध्‍या शिर्डी येथे स्थायिक झालेले साईभक्‍तबबीता टिकू व परीवार यांनी श्री साईचरणी २०६ ग्रॅम वजनाचा आकर्षक नक्षीकाम असलेला सोन्‍याचा हार अर्पण केला.
याची किंमत १३ लाख ३० हजार ३४८ रुपये आहे. हा सुंदर नक्षिकाम असलेला हार साईबाबांच्या चरणी अर्पण करुन श्री साईबाबा संस्‍थानचे मुख्‍य कार्यकारी अधिकारी गोरक्ष गाडीलकर यांच्‍याकडे सुपुर्द करण्‍यात आला. 
त्‍यानंतर श्री साईबाबा संस्‍थानच्‍या वतीने संस्‍थानचे मुख्‍य कार्यकारी अधिकारी गोरक्ष गाडीलकर यांनी देणगीदार साईभक्‍तांचा शाल व श्री साईबाबांची मुर्ती देवून सत्‍कार केला.यावेळी जनसंपर्क अधिकारी तुषार शेळके,संरक्षण अधिकारी रोहीदास माळी आदी उपस्थित होते.
