जिल्ह्यात आजपासून विधानसभा उमेदवारी अर्ज दाखल होणार

पुणे दि. २१ विधानसभा निवडणुकीसाठी मंगळवारपासून (दि.२२) उमेदवारी अर्ज भरण्यास सुरुवात होणार आहे. या निवडणुकीसाठी प्रशासन सज्ज झाले आहे. विधानसभा मतदारसंघाच्या निवडणुक कार्यालयात सकाळी ११ ते दुपारी ३ या वेळेत उमेदवारांना अर्ज भरता येणार आहे. उमेदवारी अर्ज भरण्याची अंतिम मुदत दि. २९ ऑक्टोंबर पर्यंत आहे. शनिवार-रविवारी सार्वजनिक सुट्टी यामुळे उमेदवारी अर्ज भरण्यासाठी उमेदवारांना सहा दिवसांचा अवधी आहे. विधानसभेच्या निवडणुक निर्णय अधिकारी यांच्या आदेशाने नामनिर्देशन व्यवस्थापन, ईव्हीएम व्यवस्थापन व यंत्रांचे वितरण, पोस्टल बॅलेट, इडीसी पथक, निवडणूक साहित्य वाटप पथक, मतदार यादी व्यवस्थापन, मतदार मदत कक्ष व तक्रार निवारण कक्ष, जनसंपर्क व प्रसिद्धी कक्ष, एक खिडकी कक्ष, स्वीप व्यवस्थापन अशा विविध पथकांचे समन्वय अधिकारी यांची नियुक्ती केली आहे. प्रत्येक विधानसभा मतदारसंघात ९ फिरती पथके (एफएसटी) आणि स्थिर सर्वेक्षण पथके (एसएसटी), ३ व्हिडिओ सर्वेक्षण पथके (व्हीएसटी), २ व्हिडिओ पाहणी पथकांचा (व्हीव्हीटी) समावेश आहे.