नसरापूर हत्या प्रकरणात धक्कादायक माहिती उघड; सीसीटीव्ही फुटेज पाहून पोलीसही चक्रावले!

पुणे दि.१३:- संपूर्ण राज्याला हादरवून सोडणाऱ्या पुणे जिल्ह्यातील नसरापूर येथील एका लहान मुलीवरील अत्याचार आणि हत्या प्रकरणात आता अत्यंत अनपेक्षित माहिती समोर आली आहे. या गुन्ह्याचा सखोल तपास करत असताना पोलिसांच्या हाती परिसरातील एका गोठ्या जवळचे सीसीटीव्ही फुटेज लागले असून, त्यातील दृश्यांनी तपास अधिकाऱ्यांनाही मोठा धक्का बसला आहे. सर्वात हृदयद्रावक बाब म्हणजे, वेळीच काही गोष्टी घडल्या असत्या तर या निरागस मुलीचा जीव निश्चितपणे वाचू शकला असता, असे या नव्या पुराव्यांवरून स्पष्ट होत आहे.मिळालेल्या माहितीनुसार, २ मे २०२६ रोजी ही भयंकर घटना घडली. अंगणात खेळत असलेल्या एका लहान मुलीला ६५ वर्षीय आरोपी भीमराव कांबळे याने फूस लावून गोठ्यात नेले. ही संपूर्ण हालचाल सीसीटीव्ही कॅमेऱ्यात कैद झाली आहे. गोठ्यात नेऊन या नराधमाने चिमुकलीवर अत्याचार केले आणि त्यानंतर दगडाचा वापर करून तिची अत्यंत निर्घृणपणे हत्या केली. पुरावा नष्ट करण्याच्या उद्देशाने आरोपीने तिचा मृतदेह शेणाच्या ढिगाऱ्याखाली लपवून ठेवला होता. मुलीच्या कुटुंबीयांनी आजूबाजूला शोधाशोध केली असता, गोठ्यामध्ये हा मृतदेह आढळून आला. या गंभीर घटनेची माहिती मिळताच पोलिसांनी वेगाने तपासाची सूत्रे हलवली आणि अवघ्या काही तासांतच आरोपी भीमराव कांबळे याला बेड्या ठोकल्या. या प्रकरणी पोलिसांनी न्यायालयात तब्बल २५ साक्षीदार हजर केले असून, आरोपीला १४ मे पर्यंत पोलीस कोठडी सुनावण्यात आली आहे.या प्रकरणाला आता एक वेगळेच वळण मिळाले आहे. गुन्ह्याच्या वेळी ५ ते १० वर्षे वयोगटातील ४ ते ५ लहान मुलांनी या आरोपीला थांबवण्याचा धाडसी प्रयत्न केल्याचे प्रत्यक्षदर्शी पुराव्यांवरून समोर आले आहे. ही मुले जवळच खेळत होती आणि त्यांनी हा भयानक प्रकार पाहिल्यानंतर आरोपीला रोखण्याचा प्रयत्न केला. मात्र, या नराधमाने त्या मुलांच्या दिशेने दगड भिरकावून त्यांना तिथून हुसकावून लावले.हा संपूर्ण प्रकार परिसरातील सीसीटीव्हीमध्ये चित्रित झाला असून पोलिसांनी तो महत्त्वपूर्ण पुरावा म्हणून जप्त केला आहे. विशेष म्हणजे, या प्रत्यक्षदर्शींपैकी २ मुलांची ई-साक्षदेखील नोंदवण्यात आली आहे.आरोपीने दगड मारून पळवून लावल्यानंतर घाबरलेली ही मुले धावत जाऊन पीडित मुलीच्या आजीकडे पोहोचली होती. मात्र, ‘काका झोपले आहेत, ओरडू नका’ असे सांगून आजीने त्या मुलांना घराबाहेर पाठवून दिले. जर त्या क्षणी आजीने मुलांचे म्हणणे ऐकून त्वरित बाहेर धाव घेतली असती,तर कदाचित त्या चिमुकलीवर ओढवलेला प्रसंग टळला असता आणि तिचे प्राण वाचले असते, अशी खंत आता व्यक्त केली जात आहे.