सरकारला बिबट्या हवाय की माणूस? बिबट्या प्रवण क्षेत्रातील नागरिकांचा सवाल

शिरूर दि.२२:-शिरूर आणि आंबेगाव तालुक्याच्या सीमेवरील भागात गेल्या दहा दिवसांत घडलेल्या दोन दुर्दैवी घटनांनी संपूर्ण परिसर हादरून गेला आहे. पिंपरखेड (ता. शिरूर) आणि कुमशेत (ता. जुन्नर) येथे बिबट्याच्या हल्ल्यात दोन निरागस बालकांचा मृत्यू झाला. या घटनांनी जनतेच्या मनात अस्वस्थता निर्माण केली असून एकच प्रश्न सर्वांच्या तोंडी आहे तो म्हणजे सरकारला बिबट्या हवाय की माणूस?गेल्या रविवारी सकाळी पिंपरखेड येथे पाच वर्षांच्या शिवन्या शैलेश बोंबे हिला अंगणात खेळत असताना बिबट्याने ओढून नेले. त्यानंतर अवघ्या काही दिवसांत कुमशेत येथेही अशाच प्रकारे आणखी एका चिमुकल्याचा बळी गेला. या सलग दोन घटनांमुळे परिसरात दहशत पसरली असून नागरिकांमध्ये प्रशासनाबद्दल तीव्र नाराजी आहे.रात्रीच नव्हे तर दिवसाढवळ्या बिबट्या फिरताना दिसत असल्याने गावकऱ्यांना घराबाहेर पडायलाही भीती वाटत आहे. शेतात काम करणारे शेतकरी, शाळेत जाणारी मुले आणि महिलांमध्ये प्रचंड असुरक्षिततेची भावना निर्माण झाली आहे. अनेक गावांमध्ये शाळेच्या वेळा बदलण्याचा विचार सुरू आहे. काही गावांमध्ये पालक स्वतःच मुलांना शाळेत घेऊन जात आहेत.ग्रामस्थांच्या वारंवार तक्रारीनंतरही वन विभागाकडून ठोस कृती होताना दिसत नाही. काही ठिकाणी पिंजरे लावले गेले असले तरी बिबट्या पकडला गेलेला नाही. फक्त बैठका, पंचनामे आणि कागदोपत्री हालचाली यावरच मर्यादित कृती सुरू आहे. “बिबट्यांच्या हालचालींवर नियंत्रण मिळवण्यासाठी अधिक पथके, ड्रोन निरीक्षण आणि रात्रीच्या गस्तीसाठी वाहनांची व्यवस्था व्हायला हवी,” अशी मागणी ग्रामस्थांनी केली आहे.ग्रामस्थांचा आरोप आहे की, जनतेच्या जीवावर बिबट्यांचा धोका वाढला असताना अनेक लोकप्रतिनिधी केवळ सोशल मीडियावरच प्रतिक्रिया देतात. प्रत्यक्षात घटनास्थळी येऊन परिस्थितीचा आढावा घेणारे फारच कमी. “राजकीय भाषणे आणि फोटो सेशन करून जबाबदारी पूर्ण होत नाही; आम्हाला सुरक्षितता हवी आहे,” अशी लोकांची हाक आहे. पिंपरखेडमधील एका पालकाने संतापाने सांगितले,“मुलं खेळायला बाहेर गेली की मन थरथरतं. दिवसा बिबट्यांचा वावर आहे, रात्री तर घराबाहेर पडणं अशक्य झालं आहे. सरकार आणि वन विभाग झोपले आहेत का?”ग्रामस्थांच्या मागण्या
1. बिबट्यांच्या हालचालींवर नजर ठेवण्यासाठी ड्रोन आणि थर्मल कॅमेऱ्यांचा वापर करावा.2. प्रत्येक गावात “बिबट्या प्रतिबंधक पथक” स्थापन करून प्रशिक्षण दिलं जावं.3. शाळा परिसर, रस्ते, विहिरी आणि ओसाड भागात प्रकाश व्यवस्था वाढवावी.4. शेतांभोवती फेन्सिंग व सुरक्षा दिवे बसवावेत.5. बिबट्यांच्या हल्ल्यातील पीडित कुटुंबांना तातडीने भरपाई द्यावी.निसर्ग आणि वन्यजीवांचे संरक्षण महत्त्वाचे आहेच, परंतु मानवाचे जीवन अधिक मौल्यवान आहे. वन्य प्राणी संवर्धनाच्या नावाखाली ग्रामस्थांच्या जीवाशी खेळ होऊ नये, अशी सर्वसामान्यांची भावना आहे. सरकारने आता फक्त बैठकीत नव्हे तर प्रत्यक्ष कारवाईतून लोकांच्या विश्वासास पात्र ठरावे, हीच वेळ आली आहे. बिबट्यांच्या वाढत्या हालचालींमुळे शिरूर, आंबेगाव, खेड, जुन्नर परिसरातील नागरिकांच्या मनात असलेली असुरक्षिततेची भावना दिवसेंदिवस वाढत आहे. प्रशासनाच्या दुर्लक्षामुळे एकीकडे बिबट्यांचा धोका वाढतो आहे आणि दुसरीकडे माणूस स्वतःच्या जीवावर उदार झाला आहे.आज प्रश्न फक्त बिबट्याचा नाही, तर लोकांच्या सुरक्षिततेचा आहे. सरकारला बिबट्या हवाय की माणूस — याचं उत्तर आता कृतीतून दिसायला हवं.