बापाचा खून करून फरार झालेल्या आरोपीला नारायणगाव पोलिसांनी २४ तासांत केली अटक

नारायणगाव दि.१८:- जुन्नर तालुक्यातील मांजरवाडी येथे स्वतः च्या बापाचा खून करुन फरार झालेल्या आरोपीला नारायणगाव पोलिसांनी २४ तासात अटक केली आहे. याबाबत नारायणगाव पोलीस स्टेशनचे सहाय्यक पोलीस निरीक्षक महादेव शेलार यांनी दिलेली माहिती अशी की,

मांजरवाडी गावच्या हद्दीत खंडागळे मळा येथे गणेश ज्ञानेश्वर खंडागळे (वय ३८) याने त्याचे वडील ज्ञानेश्वर नाथा खंडागळे (वय ५५, दोघेही राहणार मांजरवाडी ता. जुन्नर जि. पुणे) यांना तुम्ही बहिणीकडे चाकणला राहण्यास का जाता? या कारणावरून शिवीगाळ करून त्यांच्या छातीवर, पोटावर व डोक्यावर लाथा मारून गंभीर दुखापत केली.

ज्ञानेश्वर खंडागळे यांना उपचारासाठी पुणे येथे ससून रुग्णालयात दाखल करण्यात आले होते परंतु उपचारादरम्यान त्यांचा मृत्यू झाला आहे.फरार आरोपी गणेश खंडागळे याला काल गुरुवार दि. १६ जुलै रोजी रात्री १० वाजता नारायणगाव पोलिसांनी अटक केली असून नारायणगाव पोलीस स्टेशनचे पोलीस शिपाई आनंदा चौगुले यांनी यासंदर्भात नारायणगाव पोलीस स्टेशन येथे फिर्याद दिली आहे.

नारायणगाव पोलीस स्टेशन येथे गुन्हा दाखल करण्यात आला असून या घटनेचा अधिक तपास सहाय्यक पोलीस निरीक्षक महादेव शेलार हे करीत आहेत.