जेष्ठ अभिनेते अशोक सराफ यांना पद्मश्री पुरस्कार प्रदान; राष्ट्रपतींच्याहस्ते झाला सन्मान

मुंबई दि.२८:- राष्ट्रपती द्रौपदी मुर्मू यांच्या हस्ते मंगळवारी नवी दिल्लीत आयोजित कार्यक्रमात भारतातील 68 प्रतिष्ठित व्यक्तींना पद्म पुरस्कार प्रदान करण्यात आले. 25 जानेवारी रोजी 76 व्या प्रजासत्ताक दिनाच्या पूर्वसंध्येला पद्मविभूषण, पद्मभूषण आणि पद्मश्री या नागरी पुरस्कारांसाठी एकूण देशातील 139 प्रतिष्ठित व्यक्तींची नावे जाहीर करण्यात आली होती. मनोरंजन विश्वातील काही दिग्गजांचादेखील या सोहळ्यात पद्म पुरस्कार देऊन सन्मान करण्यात आला. अवघ्या महाराष्ट्रासाठी सन्मानाची बाब म्हणजे 27 मे रोजी जेष्ठ अभिनेते आणि महाराष्ट्र भूषण अशोक सराफ यांना राष्ट्रपती मुर्मू यांच्या हस्ते पद्मश्री पुरस्कार प्रदान करण्यात आला.राष्ट्रपती भवनात झालेल्या या वर्षातील दुसऱ्या नागरी सन्मान सोहळ्यात उपराष्ट्रपती जगदीप धनखड, पंतप्रधान नरेंद्र मोदी, केंद्रीय गृहमंत्री अमित शहा यांच्या उपस्थितीत राष्ट्रपतींनी 68 दिग्गजांना पुरस्कार प्रदान केले. अशोक सराफ म्हणाले की, ही एक आनंदाची गोष्ट आहे, अशाप्रकारे सन्मान होणे ही एक मोठी बाब आहे. हा पुरस्कार एक उच्चस्तरीय सन्मान आहे. मला आनंद आहे की, या पुरस्कारासाठी मला पात्र समजण्यात आले, म्हणजे मी आयुष्यात नक्कीच काहीतरी काम केले आहे.पद्मश्री पुरस्कार जाहीर होण्यास विलंब झाला का, असे विचारले असता अशोक सराफ म्हणाले की, ‘असे अजिबात नाही, मला हा पुरस्कार मिळाला हीच महत्वाची गोष्ट आहे. विसरले तर नाही ना? विसरले असते तर कदाचित मी काही बोललो असतो. त्यांच्या लक्षात कसे आले किंवा त्यांनी आधीच विचार केला होता, हे मला माहीत नाही. पण पुरस्कार मिळाला हीच माझ्यासाठी मोठी गोष्ट आहे.’ हा पुरस्कार मिळाल्यानंतर जबाबदारी वाढली आहे, असेही त्यांनी म्हटले.दरम्यान पुरस्कार सोहळ्यातील खास क्षण शेअर करताना अशोक सराफ यांनी अशी पोस्ट शेअर केली की, ‘पद्मश्री हा सन्मान माझ्या जीवनातील एक विशेष क्षण आहे. मी महाराष्ट्र शासनाचे आभार मानतो. माझ्या कुटुंबीयांचे, सहकलाकारांचे आणि प्रेक्षकांचेही आभार. तुमच्या प्रेमाशिवाय हे शक्य झालं नसतं. तुमचा प्रेम आणि आशिर्वाद कायम असाच राहू द्या.’ हा सोहळ्यासाठी अशोक यांच्या पत्नी अभिनेत्री निवेदिता सराफ, भाऊ सुभाष सराफ उपस्थित होते.