महिला आणि ज्येष्ठ नागरिकांना दिलेल्या सवलतींमुळे एसटी तोट्यात:- परिवहनमंत्री प्रताप सरनाईक

मुंबई दि.२२:- विधानसभा निवडणुकीआधी महायुती सरकारनं योजनांचा पाऊस पाडला. अनेक लोकानुनयी घोषणा करण्यात आल्या. त्यानंतर आता काही योजनांना कात्री लावण्यास सुरुवात झाली. लाडकी बहीण योजनेच्या लाभार्थ्यांची संख्या कमी करण्यासाठी विविध निकष लावले जात आहेत. त्यानंतर आता एसटी बसमध्ये महिला आणि ज्येष्ठ नागरिकांना मिळणारी सवलत रद्द होण्याची चर्चा सुरु झाली आहे.राज्याचे परिवहन मंत्री प्रताप सरनाईक यांनी एका कार्यक्रमात बोलताना एसटीला होत असलेल्या तोट्याचा उल्लेख केला. महिला आणि ज्येष्ठ नागरिकांना दिलेल्या सवलतींमुळे एसटी तोट्यात गेल्याचं त्यांनी म्हटलं आहे. सरनाईक यांच्या विधानामुळे एसटीत महिला आणि ज्येष्ठांना मिळणारी सवलत बंद होणार का? अशी चर्चा सुरु झाली. यावर आता उपमुख्यमंत्री एकनाथ शिंदेंनी भाष्य केलं आहे. महिला आणि ज्येष्ठ नागरिकांना दिली जाणारी सवलत बंद होणार नाही, असं एकनाथ शिंदे यांनी म्हटलं आहे.’मुख्यमंत्री माझी लाडकी बहीण योजना बंद होणार नाही. त्याचबरोबर एसटी बसच्या प्रवासात लाडक्या बहिणींना देण्यात आलेली ५० टक्के सवलत बंद होणार नाही. तसंच ज्येष्ठ नागरिकांनाही सवलत बंद केली जाणार नाही,’ असं स्पष्टीकरण उपमुख्यमंत्री शिंदेंनी दिलं.एसटी महामंडळाच्या सर्व बसेसमध्ये सवलत मिळाली. आता आमच्या बहि‍णींना ५० टक्के सवलत, तसेच जेष्ठ नागरिकांनाही बसमध्ये वर्षाला सवलत आणि त्या सवलतींमुळे परिस्थिती अशी झाली की एसटी बस दरदिवशी ३ कोटी रुपये तोट्यात आहे. आपण सर्वांनाच सवलत देत बसलो तर मला असं वाटतं की एसटी महामंडळ चालवणं कठीण होईल. त्यामुळे सध्या तरी मी याचा विचार करू शकत नाही, असं प्रताप सरनाईक म्हणाले होते. महिलांना एसटी प्रवासात दिल्या जाणाऱ्या ५० टक्के सवलतीमुळे आणि ज्येष्ठ नागरिकांच्या मोफत प्रवासामुळे महामंडळाला तोटा असल्याचं मंत्री सरनाईक म्हणाले होते. यापुढे कोणत्याही प्रकारची सवलत दिली जाणार नाही, असंही त्यांनी पुढे म्हटलं. त्यानंतर एसटी प्रवासात महिलांना दिली जाणारी सवलत रद्द होणार का, अशी चर्चा रंगली. अखेर यावर उपमुख्यमंत्र्यांनी स्पष्टीकरण दिलं.