“समर्थ मेगा फेस्टिवल” ला विद्यार्थ्यांचा उदंड प्रतिसाद; “कुछ भी खाओ दस रुपये मे”; तब्बल ११ हजार ८९७ कुपनांची विक्री

बेल्हे दि.३०:- समर्थ रूरल एज्युकेशनल इन्स्टिट्यूट संचलित समर्थ शैक्षणिक संकुल बेल्हे (ता.जुन्नर) येथे नुकताच “समर्थ मेगा फूड फेस्टिवल २०२५” मोठ्या जल्लोषात आणि आनंदात संपन्न झाला. कला, मनोरंजन, साहित्य, विचार, प्रेरणादायी व्याख्यान या सर्वांसोबतचया नावीन्यपूर्ण कार्यक्रमांचे आयोजन संकुलामध्ये नेहमीच केले जाते. विद्यार्थी व कर्मचारी यांचा उस्फूर्त प्रतिसाद पाहता विद्यार्थ्यांना खूप प्रयत्न करावे लागत होते. या मेगा फूड फेस्टिवलच्या माध्यमातून खवय्यांना दर्जेदार खाद्य पदार्थ पुरवण्याची व्यवस्था आयोजकांकडून करण्यात आलेली होती. संकुलातील सर्वांनीच त्याचा मनमुराद आनंद घेतला.

या “समर्थ मेगा फूड फेस्टिवल २०२५” चे उद्घाटन जुन्नर तालुक्याचे तहसीलदार डॉ.सुनील शेळके यांच्या शुभहस्ते करण्यात आले. त्यांच्यासमवेत सामाजिक कार्यकर्ते अशोक घोडके, जानकू डावखर, निलेश हाडवळे, गणेश हाडवळे, मच्छिंद्र हाडवळे, डॉ.विजय देशपांडे, राजेश कणसे यांनी देखील विविध खाद्यपदार्थांचा आस्वाद घेतला.यावेळी संस्थेचे अध्यक्ष वसंतराव शेळके, उपाध्यक्ष माऊली शेळके, सचिव विवेक शेळके, विश्वस्त वल्लभ शेळके, माजी जिल्हा परिषद सदस्या स्नेहल शेळके, कॅम्पस डायरेक्टर प्रा.राजीव सावंत, सर्व विभागाचे प्राचार्य, विभागप्रमुख, शिक्षक व शिक्षकेतर कर्मचारी आणि विद्यार्थी-विद्यार्थिनी मोठ्या संख्येने उपस्थित होते.“कुछ भी खाओ दस रुपये मे” अशी थीम ठेऊन संकुलातील विद्यार्थ्यांसाठी मेंदूवडा, इडली सांबर, पाणीपुरी, ओली भेळ, मंचुरियन, पावभाजी, वडापाव या खाद्यपदार्थांचे ३२ स्टॉल कार्यान्वित केले होते. विद्यार्थ्यांबरोबर शिक्षकांनी देखील या खाद्यपदार्थांच्या स्टॉलचा मनमुराद आनंद लुटला. राष्ट्रीय सेवा योजनेतील विद्यार्थी आणि विद्यार्थिनींनी या सर्व स्टॉलचे नियोजन प्राचार्य, विभागप्रमुख तसेच राष्ट्रीय सेवा योजना कार्यक्रम अधिकारी, शिक्षक व शिक्षकेतर कर्मचारी यांच्या मार्गदर्शनाखाली यशस्वीरित्या केले.जुन्नर चे तहसीलदार सुनील शेळके विद्यार्थ्यांना मार्गदर्शन करताना म्हणाले की, शालेय व महाविद्यालयीन काळात अशा प्रकारच्या उपक्रमातून व्यवहारिक जगतातले धडे मिळत असतात. “कुछ भी खाओ दस रुपये मे” ही संकल्पनाच मुळात खूप आनंद देऊन जाणारी आहे. दहा रुपयांमध्ये रुचकर, स्वादिष्ट आणि चमचमीत व खमंग पदार्थांचा समावेश आयोजकांमार्फत फूड फेस्टिवल मध्ये केल्याबद्दल मी संस्थेचे मनापासून आभार व्यक्त करतो. संस्थेच्या या अभिनव उपक्रमासाठी मला पुन्हा एकदा आमंत्रण द्या. मी पुढच्या वर्षी नक्कीच येईल असे आश्वासन यावेळी तहसीलदार डॉ.सुनील शेळके यांनी दिले. पाणीपुरीच्या स्टॉलवर भली मोठी रांग होती. अचानक गर्दी उसळल्यानंतर उडणारा गोंधळ आणि त्यावर स्वयंसेवक विद्यार्थ्यांना घेऊन यशस्वी नियोजन करताना. केलेले प्रयत्न यामुळे हा मेगा फेस्टिवल अत्यंत उत्कृष्टरित्या पार पडला. व्यावहारिक जीवनामध्ये व्यवसाय करताना येणाऱ्या अडचणी, अचानक कमी पडलेला माल आणि वाढलेली लोकांची डिमांड याचे सूत्र आणि त्याची कशी सांगड घालायची याचे धडेच जणू काही आज विद्यार्थ्यांनी या मेगा फूड फेस्टिवल च्या माध्यमातून घेतलेले दिसून आले. एखाद्या स्टॉल वरील खाद्यपदार्थ विक्री करताना ग्राहकांना नाराज न होऊ देता वेळेनुसार केलेले बदल हेही विद्यार्थ्यांनी शिकायला मिळाले.या मेगा फूड फेस्टिवलच्या माध्यमातून नक्कीच विद्यार्थ्यांना व्यवसायाचे अचूक मार्गदर्शन त्याचप्रमाणे धडे गिरवता येतील यात शंका नाही असे यावेळी मेगा फूड फेस्टिवल चे समन्वयक डॉ.लक्ष्मण घोलप म्हणाले.हा मेगा फेस्टिवल यशस्वीरित्या आयोजन करण्यासाठी डॉ.लक्ष्‍मण घोलप यांच्या मार्गदर्शनाखाली राष्ट्रीय सेवा योजनेचे विद्यार्थी, कार्यक्रम अधिकारी, सर्व विभागाचे प्राचार्य विभाग प्रमुख शिक्षक व शिक्षकेतर कर्मचारी यांनी विशेष परिश्रम घेतले.