पुणे-नाशिक महामार्गावर भीषण अपघात; ९ ठार,४ गंभीर जखमी

नारायणगाव दि.१७:- पुणे-नाशिक हायवेवर मुक्ताई धाब्याजवळ आळेफाटाकडून येणाऱ्या प्रवासी वाहतूक करणाऱ्या वाहनाची पुढे बंद अवस्थेत उभ्या असलेल्या एसटी बसवर आदळून भीषण अपघात होऊन यात ९ जण ठार झाले असल्याची माहिती तालुक्याचे आमदार शरद सोनवणे यांनी दिली. तर इतर ६ जणांवर नारायणगाव येथील खासगी रुग्णालयात उपचार सुरु आहेत. त्यांची ही प्रकृती चिंताजनक असल्याचे समजते.

याबाबत समजले माहिती अशी की, मुक्ताई धाब्याजवळ एसटी बंद अवस्थेत रस्त्याच्या कडेला उभी होती. या एसटीवर प्रवासी वाहतूक करणारी मॅक्झिमो प्रवासी वाहतूक गाडी जोरात आदळली. या प्रवासी वाहतूक करणाऱ्या गाडीला मागून येणाऱ्या आयषर टेम्पोने जोराची धडक दिल्याने हा भीषण अपघात झाला. दरम्यान आयशर टेम्पो चालकाने टेम्पो नारायणगाव पोलीस स्टेशनचसमोर सोडून दिला व तो पसार झाला.या अपघातात प्रवासी व्हॅनचा चालक, चार महिला, तीन पुरुष व एक लहान मुलगा असे आठ जण मृत्युमुखी पडले आहेत. मृत्युमुखी पडलेल्या पैकी युवराज महादेव वाव्हळ (वय २२, रा. १४ नंबर, ता. जुन्नर) व आनंदवाडी येथील प्राथमिक शाळेची शिक्षिका पाचारणे (वय ५६, रा. कांदळी, ता. जुन्नर) यांची ओळख पटली आहे.अपघातात एकूण सात जण जागेवर ठार झाले, तर दोघेजण उपचारादरम्यान ठार झाले असल्याची प्राथमिक माहिती मिळाली आहे. मृतामध्ये एक दोन वर्षाचे बालक देखील असल्याचे समजते. तसेच एकूण मृतांपैकी सहा जण खेड तालुक्यातील असल्याचे समजते. तसेच उर्वरित मयत हे पिंपळवंडी वडगाव कांदळी आणि नारायणगाव परिसरातील असल्याचे समजते. दरम्यान या अपघातामध्ये मृत्यू झालेल्या व जखमी झाल्यांची नाव अद्याप समजू शकले नाही. या घटनेमुळे जुन्नर तालुक्यामध्ये हळहळ व्यक्त केली जात आहे.