काठ्यांच्या मिरवणुकीने कोरठण यात्रेची सांगता; हजारो भाविकांकडून खंडोबाचे दर्शन

कान्हूरपठार दि.१७:-राज्यातील भाविकांचे श्रद्धास्थान असलेल्या पिंपळगाव रोठा (ता. पारनेर) येथील श्री क्षेत्र कोरठण खंडोबा देवस्थानच्या तीन दिवसांच्या यात्रोत्सवाची सांगता ब्राह्मणवाडा (ता. अकोले) व बेल्हे (जि. पुणे) व अन्य गार्वाच्या मानाच्या काठ्यांच्या मिरवणुकीनंतर देवदर्शन व कळस दर्शनानंतर इतर गावच्या मानाच्या काठ्घांच्या मिरवणुकीनंतर शांततेत व उत्साहात सांगता झाली. यात्रोत्सवा दरम्यान हजारो भाविकांनी खंडोबाचे दर्शन घेतले. दरम्यान बुधवारी कोरठणला भाविकांच्या गर्दीचा उच्चांक झाला.बुधवारी (दि. १५) पहाटेपासून दर्शनासाठी भाविकांच्या रांगा लागल्या होत्या. सकाळी खंडोबाची चांदीची पालखी व अळकुटी, बेल्हे, कांदळी, माळवाडी, सावरगांव घुले, कासारे कळस येथील मानाच्या पालख्यांची मंदिर प्रदक्षिणा मिरवणूक सुरू झाली.ही मिरवणूक दुपारी मंदिरासमोर आल्यानंतर पालखी मानकऱ्यांचा देवस्थानकडून सन्मान करण्यात आला. दुपारी १ वाजता यात्रेचे मुख्य आकर्षण असलेल्या बेल्हे व ब्राह्मणवाडा येथील मानाच्या काठ्यांची शाही मिरवणूक सुरू झाली. या मिरवणुकीत हजारो भाविक सहभागी झाले होते. दुपारी तीनच्या सुमारास दोन्ही काठ्या मंदिरासमोर आल्यानंतर पोलिस निरीक्षक समीर बारवकर यांच्या हस्ते काठ्यांची शासकीय महापूजा व महाआरती करण्यात आली.या प्रसंगी देवस्थानच्या अध्यक्षा शालिनी घुले, उपाध्यक्ष महेश शिरोळे, ज्येष्ठ विश्वस्त अॅड पांडुरंग गायकवाड, तुकाराम जगताप, जालिंदर खोसे, राजेंद्र चौधरी, चंद्रभान ठुबे, सुरेश फापाळे, रामदास मुळे, धोंडीभाऊ जगताप, कमलेश घुले, अजित महांडुळे, सुवर्णा घाडगे, दिलीप घुले, महादेव पुंडे, माजी सरपंच अशोक घुले, सरपंच सुरेखा वाळुंज, बाजार समितीचे सभापती बाबाजी तरटे, संजय वाघमारे, गोपीनाथ घुले, अमर गुंजाळ यांच्यासह हजारो भाविक उपस्थित होते. शासकीय महापूजा व महाआरतीनंतर ब्राह्मणवाडा काठीने देवदर्शन, तर बेल्हे काठीने कळस दर्शन घेतले. यानंतर इतर गावांच्या मानाच्या काठ्यांच्या मिरवणुका पार पडल्या. यात्रेदरम्यान मुंबई, ठाणे, नाशिक, नगर, संगमनेर, जुन्नर, अकोले येथील मोठ्या संख्येने भाविक कोरठणला आले होते. सर्वाधिक भाविक पुणे जिल्ह्यातून आले होते.पोलिसांनी चोख पोलिस बंदोबस्त ठेवला होता. भाविकांच्या सोयीसाठी एस टी कडून जादा गाड्या सोडण्यात आल्या होत्या. आरोग्य विभाग यांनीही चोख व्यवस्था ठेवली होती.