बिबट्याच्या हल्यात दुचाकीस्वार जखमी

ओतूर दि.६:- अजिंक्य गोरक्ष जाधव (वय 17 वर्ष) रा. धावशी ओतूर (ता. जुन्नर) या मुलावर मोटारसायकल वरून जात असताना त्यांचे वर ओतूर येथील पाथरटवाडी येथे बिबट्याने हल्ला करून त्यांना किरकोळ जखमी केले ही घटना रविवार दि.५ रोजी घडली.

त्यांना वनविभागाने तात्काळ ओतूर येथील ग्रामीण रुग्णालयात दाखल केले. त्या ठिकाणी प्राथमिक उपचार घेऊन पुढील उपचारासाठी नारायणगाव ग्रामीण रुग्णालय या ठिकाणी नेण्यात आले. तसेच वनपरिक्षेत्र अधिकारी लहू ठोकळ त्यांच्या मार्गदर्शनाखाली घटनास्थळी तात्काळ वन विभागाचे पथक दाखल होऊन. एस. एम. बुट्टे वनपाल ओतूर, व्ही. ए. बेले वनरक्षक ओतुर, किशन केदार, फुलचंद खंडागळे, साहेबराव पारधी व रेस्क्यू टीम यांनी सदर ठिकाणी पिंजरा लावून बिबट वन्य प्राण्याबद्दल माहिती देऊन स्वसंरक्षणार्थ उपाययोजना सांगून जनजागृती करीत आहेत.तरी वन विभागाकडून असे आवाहन करण्यात येते की पहाटे उघड्यावर शौचालयास जाऊ नये तसेच रात्री उघड्यावर झोपू नये व तसेच बिबटप्रवण क्षेत्रातून वाहनाद्वारे जात असताना वाहनाचे हॉर्न मोठ्याने वाजवणे जेणेकरून रस्त्याच्या बाजूला दबा धरून बसलेले वन्यप्राणी त्याची जागा बदलतील.