चीनमध्ये कोरोनापेक्षा भयंकर व्हायरसचे थैमान; ‘एचएमपीव्ही’ व्हायरसने केला कोरोनासारखा कहर; जगासाठी धोक्याची घंटा?

बिजिंग दि.४:- साधारण चार वर्षांपूर्वी संपूर्ण जगभरात एकाच आजाराची दहशत होती. हा आजार, किंबहुना ही महामारी होती कोरोना व्हायरसची.

चीनमधून डोकं वर काढलेल्या कोरोना विषाणूच्या संसर्गानं पाहता पाहता सारं जग व्यापलं आणि सगळीकडेच लॉकडाऊनपर्यंतची परिस्थिती ओढावली. आता कुठे या महामारीच्या संकटातून जग सावरत नाही आणि नागरिकांचं आयुष्य पूर्वपदावर येत नाही तोच आता चीनमध्ये पुन्हा एका महामारीनं डोकं वर काढलं असून हे संकट जगासाठीही धोक्याची घंटा असल्याचं म्हटलं जात आहे.चीनमध्ये सध्या रुग्णालयांमध्ये लांबच लांब रांगा पाहायला मिळत असून, इथं नागरिकांनी पुन्हा एकदा सक्तीनं मास्कचा वापर सुरू केला आहे. चीनमध्ये सध्या सुरू असणाऱ्या घडामोडी संशयास्पद असल्याचं म्हणत जागतिक स्तरावरील वृत्तसंस्थांमध्ये हे राष्ट्र पुन्हा एकदा जगाला संकटात टाकू शकतं याविषयीची शंका व्यक्त केली जात आहे.

कोरोना काळात जी परिस्थिती पाहायला मिळाली होती असंच काहीसं चित्र सध्या चीनमध्ये पुन्हा पाहायला मिळत आहे. सध्या इथं रुग्णालयांमध्ये लांबच लांब रांगा असून, हे सर्वकाही HMPV नावाच्या एका विषाणूजन्य आजारामुळं घडत असल्याचं सांगण्यात येत आहे.सध्या चीनमध्ये चार विषाणूंचा संसर्ग फोफावला असून, इथं एचएमपीव्ही म्हणजेच माइकोप्लाज्मा निमोनिया अतिशय झपाट्यानं पसरत असल्यानं आरोग्य यंत्रणाही चिंतेत आल्या आहेत. या विषाणूची एकंदर रचना कोरोनाच्या विषाणूप्रमाणंच असून तो हवेमार्फत संक्रमित होत असल्याचं सांगण्यात येत आहे. चीनमध्ये पुन्हा एकदा रुग्णालयांपासून स्मशानांपर्यंत सतर्कता बाळगली जात असतानाच कोविडप्रमाणंच यावेळीसुद्धा जागतिक आरोग्य संघटनेनं मात्र यावर कोणतंही वक्तव्य केलेलं नाही. एकिकडे चीनमध्ये परिस्थिती आणखी बिघडत असल्याचं चित्र स्पष्टपणे दिसत असतानाच. दुसरीकडे WHO नं याविषयी कोणतीही स्पष्टोक्ती न देणं ही गंभीर बाब ठरत आहे. किंबहुना चीन कोरोनाप्रमाणंच आणखी एक महामारी जगाला देणार का? हाच चिंताजनक प्रश्न आता अनेक स्तरांतून उपस्थित केला जात आहे.