विजयस्तंभ कार्यक्रमामुळे पुणे-अहिल्यानगर वाहतुकीत बदल:- प्रभारी जिल्हाधिकारी संतोष पाटील

शिक्रापूर दि.२९:- कोरेगाव भीमा (ता. शिरूर) सह पेरणे (ता. हवेली) येथे विजयस्तंभ अभिवादन कार्यक्रमासाठी १ जानेवारी रोजी मोठ्या प्रमाणावर अनुयायी येत असतात.

अभिवादन कार्यक्रमानिमित्त पुणे ते अहिल्यानगर महामार्गावर वाहतूककोंडी होऊ नये. म्हणून ३१ डिसेंबर २०२४ रोजी सायंकाळपासून ते १ जानेवारी २०२५ रोजी रात्री बारा वाजेपर्यंत दोन्ही बाजूकडील वाहतुकीत तात्पुरत्या स्वरूपात बदल करण्याचे आदेश प्रभारी जिल्हाधिकारी संतोष पाटील यांनी जारी केले आहेत.कोरेगाव भीमासह पेरणे, ता. हवेली येथे विजयस्तंभ अभिवादन कार्यक्रम निमित्ताने चाकण ते शिक्रापूर व शिक्रापूर ते चाकण अशी दोन्ही बाजूकडील येणारी जाणारी सर्व प्रकारची वाहतूक पूर्णपणे बंद करण्यात येणार असून. अहिल्यानगर कडून पुणे मुंबईकडे येणारी जड वाहने ही शिरुर न्हावरा फाटा, न्हावरा, पारगाव, चौफुला, यवत, हडपसर या मार्गे पुण्याकडे जातील. तर पुण्याहून अहिल्यानगरकडे जाणारी जड वाहने खराडी बाह्यवळण मार्गे हडपसर वरुन पुणे-सोलापूर महामार्गाने चौफुला, केडगाव मार्गे न्हावरा, शिरुर ते अहिल्यानगर अशी वळविण्यात येतील. तसेच सोलापूर महामार्गावरुन आळंदी, चाकण या भागात जाणारी जड वाहने, ट्रक, टेम्पो आदी माल वाहतूक हडपसर, मगरपट्टा, खराडी बाह्यवळणमार्गे विश्रांतवाडीहून आळंदी व चाकण येथे

जातील आणि मुंबईहून अहिल्यानगरकडे जाणारी जड वाहने, ट्रक, टेम्पो आदी माल वाहतूक वडगाव मावळ, चाकण, खेड, मंचर, नारायणगाव, आळेफाटामार्गे अहिल्यानगरकडे जातील तसेच मुंबईहून अहिल्यानगरकडे जाणारी कार, जीप आदी हलकी वाहने वडगाव मावळ, चाकण, खेड, पाबळ, शिरुर मार्गे अहिल्यानगरकडे जातील, असे देखील प्रभारी जिल्हाधिकारी संतोष पाटील यांनी दिलेल्या आदेशात नमूद करण्यात आले आहे.