मंत्रिपद न मिळाल्यानं छगन भुजबळ प्रचंड नाराज? शपथविधी सोहळ्याकडे फिरवली पाठ; समर्थकही आक्रमक

नागपूर दि.१६:- ३३ वर्षांपूर्वी महाराष्ट्राच्या राजकारणात भूकंप निर्माण करणारे ज्येष्ठ नेते, राष्ट्रवादी काँग्रेसचे आमदार छगन भुजबळ यांना आज मंत्रीमंडळात स्थान देण्यात आले नाही. परिणामी संतप्त झालेल्या भुजबळांनी राष्ट्रवादीच्या मेळाव्याला तसेच शपथविधी सोहळ्याकडे पाठ दाखविली. या घडामोडीमुळे उलट सुलट चर्चेला उधाण आले असून नागपूरच्या बोचऱ्या थंडीत राजकीय वातावरण तापले आहे. माजी मंत्री छगन भुजबळ हे नागपूरमधील हॉटेल रेडिसन ब्ल्यू मधेच होते. आज दिवसभर छगन भुजबळ यांनी राष्ट्रवादी काँग्रेस पक्षाच्या कार्यक्रमासह शपथविधीला जाणं देखील टाळलं असल्याचं पाहायला मिळालं. लोकसभा, विधानसभा निवडणुकीत राज्यभरात महायुतीसाठी ओबीसी समाजाची ढाल म्हणून काम करून देखील मंत्रिपद न मिळाल्याने भुजबळांची नाराजी असल्याचे समजते. राजकीय लढाईत लढण्यासाठी छगन भुजबळांची गरज मात्र ज्यावेळी मंत्रिपदाची संधी द्यायची वेळ आली. त्यावेळी थेट डावलणं योग्य नसल्याची भावना देखील व्यक्त करण्यात आली.राज्यात आमदारांची घरं जळत असताना ओबीसींच्या घरांवर हल्ले होत असताना सगळे ओबीसी नेते गायब होते. त्यावेळी महायुतीसाठी एकट्यानं लढाई लढून सत्ता अणण्यास मदत केली. मात्र, आता संधी द्यायच्या वेळी दुर्लक्ष केल्याने भुजबळांची नाराजी असल्याचं कळतंय. एकीकडे भुजबळांची नाराजी असली तरी उद्या विधीमंडळ कामकाजात भुजबळ सहभागी होणार असल्याचे समजते. राष्ट्रवादी काँग्रेसचे नेते छगन भुजबळ यांना मंत्रिमंडळात स्थान न मिळाल्याने समर्थक आक्रमक झाले होते. राष्ट्रवादी काँग्रेसच्या नाशिक कार्यालयाबाहेर टायर जाळून निषेध करण्यात आल्याची माहिती मिळत आहे. ओबीसी कार्यकर्त्यांकडून राष्ट्रवादी काँग्रेस कार्यालयाबाहेर निषेध व्यक्त करत छगन भुजबळ यांना मंत्रिमंडळात स्थान देण्याची मागणी करण्यात आली आहे.