बांगरवाडी पतसंस्थेला ८ लाख ४१ हजार रुपयांचा नफा; सभासदांना १०% लाभांश जाहीर
बेल्हे दि.१६ : बांगरवाडी (ता.जुन्नर) येथील ग्रामीण बिगरशेती सहकारी पतसंस्थेची २२ वी वार्षिक सर्वसाधारण सभा खेळीमेळीच्या वातावरणात नुकतीच संपन्न झाली. सभेत संस्थेचे संस्थापक अध्यक्ष वसंत कदम यांनी संस्थेला आर्थिक वर्षात ८ लाख ४१ हजार ६४९ रुपये नफा झाला असून सभासदांना १० टक्के लाभांश देण्याचा निर्णय जाहीर केला.
२००१ साली स्थापन झालेल्या आपल्या पतसंस्थेचा कारभार अतिशय पारदर्शक असून कर्मचारी वर्गही मेहनतीने व सस्मित मुद्रेने सेवा करत आहे. गेल्या दोन वर्षापासून आपल्याला ऑडिट वर्ग ‘ब’ मिळत असून संस्थेचे भागभांडवल साधारणपणे ११ कोटी रुपये, ठेवी ९ कोटी रुपये, कर्जवाटप ८ कोटी रुपये, गुंतवणूक २ कोटी रुपये, एवढे असून संस्थेची सभासद संख्या ५९७ एवढी आहे. 
यावेळी अध्यक्ष वसंत कदम यांनी आपले मनोगत व्यक्त करताना सहकार खात्याचे बदलते नियम, आर्थिक चढउतार याचा पतसंस्थेच्या व्यवहारावर कोणताही परिणाम झाला नसून गेली बावीस वर्षे आपल्या सर्वांच्या सहकार्याने व सहकार कायद्याच्या चौकटीत राहून व सहकाराची ज्योत तेवत ठेवण्याच्या भावनेतून संचालक मंडळाने यशस्वीपणे काम केले आहे. 
हे कामकाज करत असताना सर्व संचालक मंडळ, सेवक वर्ग, सभासद, ठेवीदार, कर्जदार व हितचिंतक यांचे अमूल्य सहकार्य मिळाले आहे, तसेच संचालक मंडळावर सर्वांनी दाखविलेला विश्वासच याला कारणीभूत आहे.या सर्वसाधारण सभेत संस्थेने घेतलेले धोरणात्मक निर्णय व संस्थेने केलेल्या कामाचा आढावा.
तसेच संस्थेच्या प्रगतीचा चढता आलेख संस्थेचे व्यवस्थापक प्रमोद बांगर यांनी सभासदांसमोर ठेवला. यावेळी संस्थेचे सर्व संचालक, सभासद बहुसंख्येने उपस्थित होते, आलेल्या सर्व सभासदांचे व मान्यवरांचे आभार संचालक रमेश कसबे यांनी मानले.
