शैलजा दराडे यांना अटक; भरतीसाठी तरुणांकडून कोट्यावधीची जमवली माया; डी.एड.पदावर शिक्षक १२ लाख, बी.एड १५ लाख, तलाठी १२ लाख, टीईटी ४ लाख असे होते दर

पुणे दि.८:- महाराष्ट्र राज्य परीक्षा परिषदेच्या तत्कालीन प्रभारी आयुक्त शैलजा दराडे यांना हडपसर पोलिसांनी अटक केली. शिक्षण विभागात नोकरी लावण्याच्या आमिषाने बारा ते पंधरा लाख रुपये घेऊन फसवणूक केल्याचा गुन्हा त्यांच्यासह त्यांचा भाऊ दादासाहेब रामचंद्र दराडे (रा. इंदापूर) यांच्यावर यापूर्वीच गुन्हा दाखल करण्यात आला होता. त्यांनी 44 जणांची फसवणूक केल्याचे प्राथमिक तपासात उघड झाले होते. दरम्यान, शैलेजा दराडे यांना यापूर्वीच निलंबित करण्यात आले आहे.या दोघांवर 23 फेब्रुवारी 2023 रोजी गुन्हा दाखल झाला होता. यानंतर त्यांनी जामिनासाठी पळापळ केली होती. त्यांनी पुण्यातील अतिरिक्त जिल्हा न्यायालयाकडे अटकपूर्व जामिनासाठी 29 एप्रिल 2023 रोजी अर्ज केला होता. हा अर्ज न्यायालयाने फेटाळला होता. यानंतर त्यांनी वरच्या न्यायालयात दाद मागितली होती. हा घोटाळा राज्यव्यापी असून फसवणुकीची रक्कम चार ते पाच कोटी रुपयांपर्यंत असल्याचे पोलिसांनी सांगितले. याप्रकरणी पोपट सुखदेव सूर्यवंशी (रा. आटपाडी, सांगली) यांनी फिर्याद दिली होती.पोलिसांनी दिलेल्या माहितीनुसार फिर्यादी हे सांगली जिल्हा प्राथमिक शिक्षक बँकेचे माजी अध्यक्ष आहेत. त्यांना व इतर शिक्षकांना आरोपी दादासाहेब दराडे याने 2019 मध्ये सांगितले की, “त्याची बहीण शैलजा दराडे प्रशासकीय अधिकारी असून शिक्षक भरती, बदली, तलाठी आणि टीईटी परीक्षा पास करणे अशी कामे करते.’ त्याच्या सांगण्यानुसार फिर्यादी आणि काही शिक्षकांनी शैलजा दराडे यांची पुण्यातील सेंट्रल बिल्डिंगमधील कार्यालयात भेट घेतली होती. त्यांनी “डी.एड. पदावर शिक्षक म्हणून बारा लाख, बी.एड. पदावर शिक्षक म्हणून 15 लाख, तलाठी म्हणून 12 लाख आणि टीईटी परीक्षा पास करण्यासाठी चार लाख रुपये दर सांगितला.
रक्कम रोख स्वरुपात स्वीकारली जाईल, मात्र माझे नाव कोठेही सांगायचे नाही’ असे सांगितले होते. त्यानुसार फिर्यादी आणि त्याच्या दोन नातेवाईकांनी 27 लाख रुपये दादासाहेब दराडेला हडपसर येथे दिले होते. मात्र फसवणूक झाल्यावर फिर्यादीने तक्रार दिली. तक्रारीचा तपास करता 44 जणांची फसवणूक झाल्याचे लक्षात आले. यामध्ये सोलापूर आणि सांगली जिल्हयातील नागरिक मोठ्या प्रमाणात फसले गेले आहे. हा राज्यव्यापी घोटाळा असल्याचे म्हटले जात आहे. दरम्यान, शैलेजा दराडे यांना मंगळवारी न्यायालयात हजर केले जाणार आहे, असे वरिष्ठ पोलीस निरीक्षक रवींद्र शेळके यांनी सांगितले.