राजुरी येथे ‘मशिन लर्निंग फंडामेंटल्स’ फॅकल्टी डेव्हलपमेंट कार्यक्रमाचे थाटात उद्घाटन

राजुरी दि.१६:- महरिया चॅरिटेबल ट्रस्टच्या सह्याद्री व्हॅली कॉलेज ऑफ इंजिनिअरिंग अँड टेक्नॉलॉजी, राजुरी (ता.जुन्नर) येथे अखिल भारतीय तंत्रज्ञान शिक्षण परिषदेच्या (AICTE) अटल(ATAL) अकादमीतर्फे प्रायोजित, ‘मशिन लर्निंग फंडामेंटल्स: बिल्डिंग एआय स्किल्स’ या एक आठवड्याच्या फॅकल्टी डेव्हलपमेंट प्रोग्राम (FDP) चे उद्घाटन सोमवारी, १५ डिसेंबर २०२५ रोजी उत्साहात पार पडले.या कार्यक्रमाचे आयोजन संस्थेच्या यांत्रिकी अभियांत्रिकी (पॉलिटेक्निक) विभागाने केले आहे, जे २० डिसेंबर २०२५ पर्यंत चालणार आहे. प्रमुख पाहुण्यांची उपस्थिती
उद्घाटन समारंभाला तंत्रज्ञान आणि शिक्षण क्षेत्रातील अनेक मान्यवर उपस्थित होते. कार्यक्रमाचे प्रमुख पाहुणे म्हणून डॉ. किशोर वाघ (AISSMS IOT, पुणे) आणि डॉ.शर्मिला वाघ (प्राध्यापिका, वाडिया कॉलेज ऑफ इंजिनिअरिंग, पुणे) यांनी आपली उपस्थिती दर्शविली. संस्थेचे खजिनदार सचिन चव्हाण आणि शैक्षणिक अधिष्ठाता (Academic Dean) पी. बलरामूडू हे देखील मंचावर उपस्थित होते.डॉ. किशोर वाघ यांनी आपल्या मार्गदर्शनात सांगितले की, “आजच्या युगात मशिन लर्निंग आणि आर्टिफिशियल इंटेलिजन्स (AI) हे केवळ भविष्याचेच नाही, तर वर्तमानाचेही कौशल्य आहे. प्राध्यापकांनी हे ज्ञान केवळ शिकण्यापुरते मर्यादित न ठेवता, ते विद्यार्थ्यांना प्रभावीपणे देण्यासाठी सज्ज व्हावे.” डॉ. शर्मिला वाघ यांनी एआय तंत्रज्ञानाच्या सामाजिक जबाबदारीवर भर दिला आणि शिक्षकांनी नैतिक दृष्टिकोन ठेवून या क्षेत्रात काम करण्याचे आवाहन केले. संस्थेचे शैक्षणिक अधिष्ठाता पी. बलरामूडू यांनी FDP च्या माध्यमातून प्राध्यापकांमध्ये ‘AI Building Skills’ विकसित करण्याच्या संस्थेच्या ध्येयाचा पुनरुच्चार केला. त्यांनी AICTE-ATAL ने दिलेल्या सहकार्याबद्दल आभार मानले.या कार्यक्रमात महाराष्ट्रासह देशातील विविध अभियांत्रिकी आणि पॉलिटेक्निक महाविद्यालयांतील प्राध्यापक सहभागी झाले आहेत. कार्यक्रमाच्या यशस्वी आयोजनासाठी यांत्रिकी अभियांत्रिकी विभागाचे प्राध्यापक आणि विद्यार्थी यांनी परिश्रम घेतले.