यकृतदानाने बहीण-भावाचे बंध दृढ; मुलुंडमधील रुग्णालयात यशस्वी यकृत प्रत्यारोपण शस्त्रक्रिया

मुंबई दि.९:- अवयवदान आणि प्रत्यारोपण शस्त्रक्रिया करण्याची वेळ येते, त्या वेळी अनेकदा महिला पुढाकार घेताना दिसतात. मात्र, गुजरातमधील पालनपूर येथील एका ३२ वर्षीय तरुणाने आपल्या २७ वर्षीय बहिणीचा जीव वाचवण्यासाठी स्वतःच्या यकृताचा भाग दान केल्याचे समोर आले आहे. या यकृतदानाने या बहीण-भावाचे बंध दृढ झाले असून, या बहिणीसाठी हे रक्षाबंधन संस्मरणीय ठरणार आहे. ही यकृत प्रत्यारोपणाची शस्त्रक्रिया नुकतीच मुलुंडमधील एका खासगी रुग्णालयात पार पडली.सुप्रियाला (नाव बदलले आहे) विल्सन हा अतिशय दुर्मीळ प्रकारचा आनुवंशिक आजार झाला होता. या आजाराचे वेळेवर निदान न झाल्यामुळे यकृत निकामी होण्यासह गुंतागुंतीच्या समस्याही निर्माण होऊ शकतात. सुप्रियाच्या यकृताला इजा होण्यासह तिला कावीळ झाली. हा आजार पुढील टप्प्यात पोहोचला. त्यामुळे तिला यकृत प्रत्यारोपण शस्त्रक्रिया करण्याची गरज निर्माण झाली. यकृत प्रत्यारोपणतज्ज्ञ डॉ. विक्रम राऊत आणि त्यांच्या टीमने ही गुंतागुंतीची शस्त्रक्रिया यशस्वीरीत्या पार पाडली. सन २०१७ मध्ये तिच्या मोठ्या भावाला या आजाराचे निदान झाले होते. त्यानंतर त्या संपूर्ण कुटुंबाची तपासणी करण्यात आली. त्यात सुप्रियालाही हा आजार असल्याचे निदान झाले. सन २०१८ पासून तिच्यावर वैद्यकीय उपचार सुरू होते.मात्र, त्यात यश मिळत नव्हते. पुढे तिची प्रकृती अधिक ढासळत गेली. त्यानंतर प्रत्यारोपणाशिवाय दुसरा पर्यायच उपलब्ध नव्हता. ‘ज्या बहिणीने लहानपणापासून साथ दिली, जिवाभावाचे नाते जपले, तिच्यामुळे आईसारखी माया अनुभवायला मिळाली, त्या बहिणीचा जीव वाचावा, हीच माझी इच्छा होती. तिला आरोग्यदायी आयुष्य मिळावे, या भावनेतून हा निर्णय घेतला,’ असे तिच्या भावाने सांगितले. ‘त्या क्षणी कसलीही भीती वाटली नाही. फक्त बहिणीचा जीव वाचावा, इतकीच भावना मनामध्ये होती,’ असे तो म्हणाला.या वर्षाच्या सुरुवातीला सुप्रियाला डोके दुखणे, रक्तस्राव होणे असे त्रास होऊ लागले. अहमदाबाद येथे डॉक्टरांचा सल्ला घेतल्यानंतर प्रत्यारोपण करण्याचा निर्णय घेण्यात आला. सुप्रियाची वैद्यकीय तपासणी झाल्यानंतर तिच्या भावाचीही तपासणी करण्यात आली. त्या वेळी त्याला यकृतदान करता येणे शक्य असल्याचे स्पष्ट झाले. डॉक्टरांनी ही माहिती दिल्यानंतर एक क्षणही न घालवता बहिणीसाठी यकृतदान करण्याचा निर्णय त्याने घेतला.