गुन्हेगार पुढे, पोलीस मागे, स्वारगेट बस स्थानकासमोर मोठा थरार

पुणे दि.२६:- पुण्याच्या स्वारगेट बस स्थानकावर समोर एखाद्या चित्रपटासारखा थरार बघायला मिळाला आहे. गुन्हेगार पुढे आणि पोलीस मागे असा थरार सुरु होता. पोलीस ज्या आरोपींच्या मागे धावत होते ते आरोपी हा गांजा तस्कर होते, अशी माहिती समोर येत आहे. स्वारगेट बस स्थानकासमोरच पोलीस आणि गांजा तस्कर यांच्यात थरार बघायला मिळाला. अखेर पोलिसांनी या गांजा तस्करांच्या मुसक्या आवळल्या. आरोपी हे सोलापूरहून पुण्यात गांजा तस्करी करण्यासाठी आले होते. पोलिसांनी खूप तत्परतेने स्वारगेट परिसरात त्यांचा पाठलाग करून त्यांची गचांडी पकडली.आरोपींची कार जप्त करण्यात आली आहे. तसेच आरोपींकडे तब्बल 6 किलो गांजा सापडला आहे.पोलिसांनी या कारवाईत स्विफ्ट गाडीसह 16 लाखांचा मुद्देमाल ताब्यात घेतला आहे. स्वारगेट विभागाचे सहाय्यक पोलीस आयुक्त राहुल आवारे, पोलीस निरीक्षक संपतराव राऊत, पोलीस आमदार राहुल होळकर, विक्रम सावंत यांच्यासह पथकाने ही मोठी कारवाई केली. पोलिसांना एका गुप्त बातमीदाराकडून याबाबत माहिती मिळाली होती. सोलापूरहून काहीजण कारमधून गांजा तस्करीसाठी येणार असल्याची गुप्त माहिती पोलिसांना मिळाली होती. त्याआधारावर पोलिसांनी सापळा रचला.या दरम्यान पोलिसांनी एक संशयास्पद कार थांबवण्याचा प्रयत्न केला. पण आरोपींनी कार न थांबवता पळून जाण्याचा प्रयत्न केला. यावेळी पोलिसांनी मोठ्या शिताफीने पळून जाणाऱ्या आरोपींना पकडण्याचा प्रयत्न केला. काही मिनिटे धावपळ आणि पाठलाग केल्यानंतर पोलिसांनी तीनही आरोपींना ताब्यात घेतलं. पोलिसांनी या प्रकरणी तीनही आरोपींना एनडीपीएस कायद्यांतर्गत गुन्हा दाखल केला आहे. पोलिसांनी कारवाईनंतर गांजाची मूळ सोर्स आणि तस्करीचं नेटवर्क शोधण्यासाठी तपास सुरू केला आहे. आरोपी नेमके कुठून आले आणि कुणाला गांजा देणार होते? याबाबत महत्त्वाची माहिती तपासातून समोर येण्याची शक्यता आहे. या प्रकरणी काय काय माहिती मिळते ते पाहणं महत्त्वाचं आहे.