चोरी करण्यासाठी आला अन् पोलिसांच्या सापळ्यात अडकला 

अहिल्यानगर दि.१५:- अहिल्यानगर शहरातील माळीवाडा बसस्थानक परिसरात चोरी करण्यासाठी आला अन् जेरबंद झाला आहे. कोतवाली पोलिसांनी सापळा रचून आरोपीला ताब्यात घेतले. आरोपीने यापूर्वी शहरातील माळीवाडा येथील एका मठात चोरी केली असल्याचे तपासात उघड झाले.

त्याच्याकडून १३ हजारांचा मुद्देमाल हस्तगत करण्यात आला आहे. रुपेश दादासाहेब खोजे (वय ३४, रा . कासार पिंपळगाव, ता. पाथर्डी), असे ताब्यात घेतलेल्या संशयित आरोपीचे नाव आहे.

कोतवाली पोलीस ठाण्याचे पोलीस निरीक्षक प्रताप दराडे यांना मिळालेल्या माहितीनुसार शहरातील शंकर महाराज मठात चोरी करणारा आरोपी माळीवाडा येथे चोरी करण्यासाठी येणार असल्याची खात्रीशीर माहिती मिळाली. त्यानुसार पथकाने सापळा रचून आरोपीला ताब्यात घेतले.

त्याच्याकडून मठात चोरी केलेला मुद्देमाल हस्तगत केला. ही कारवाई सहायक पोलीस निरीक्षक योगिता कोकाटे, पोलीस अंमलदार रोहिणी दरंदले, राजेंद्र औटी, संदीप पितळे, विशाल दळवी, दीपक रोहकले, तानाजी पवार, सूरज कदम, शिरीष तरटे, दत्तात्रय कोतकर, सचिन लोळगे, राम हंडाळ, सोमनाथ केकाण यांच्या पथकाने केली.