वाहनांची चोरी करणार अट्टल गुन्हेगार आळेफाटा पोलिसांनी केला जेरबंद

आळेफाटा दि.२८:- चारचाकी वाहन चोरी करणार अट्टल गुन्हेगारांस आळेफाटा पोलिसांनी केली अटक असून सदर गुन्हेगाराकडून १ लाख ४० हजार किंमतीचा मुद्देमाल हस्तगत करण्यात आला आहे.याबाबत आळेफाटा पोलिसांनी दिलेल्या माहितीनुसार आळेफाटा (ता.जुन्नर) नगर रोडवर असलेल्या पसायदान कॉम्प्लेक्स या ठिकाणाहुन (दि.९) रोजी रात्रीच्या सुमारास भिमाशंकर सखाराम आवटे यांचे मालकीचे त्यांनी पार्किंग करून ठेवलेले महेंद्रा बोलेरो कंपनीचे केन क्र. एमएच ०४ डीटी ०२८३ हे अज्ञात चोरटयाने चोरून नेल्याची फिर्याद पोलीस स्टेशनमध्ये दिली होती.

दाखल गुन्हयामध्ये क्रेन चोरीला गेल्याने तसेच आजुबाजुच्या परीसरातून चारचाकी वाहने चोरीला जात असल्याचे गांभीर्य लक्षात घेता आळेफाटा पोलीस स्टेशनचे पोलीस निरीक्षक यशवंत नलावडे यांनी पोलीस स्टेशनकडील स्टापची पथके बनवुन त्यांना सदरचा गुन्हा उघडकीस आणण्याचे दृष्टीने सुचना केल्या होत्या.

त्यानुसार पोलीस पथक अधिकारी सहाय्यक पोलीस निरीक्षक सुनिल बडगुजर व त्यांच्या पथकाने सदर गुन्ह्याचे तांत्रिक विश्लेषन करून व गोपनिय बातमीदारामार्फत माहीती मिळवुन त्यानुसार यातील अज्ञात आरोपींचा माग काढत राजु बाबुराव जावळकर (वय ५५वर्षे, रा. रिध्दी सिध्दी अपार्टमेट, फ्लॅट नं. ४०३, डोणजेफाटा ता. हवेली जि. पुणे) यांस पुणे या ठिकाणी जाऊन ताब्यात घेतले.

त्यांच्याकडे गुन्हयाच्या अनुषंघाने चौकशी केली असता त्याने सदर गुन्ह्याची कबुली देवून सदरचे क्रेन हे अंगद पुनम यादव (सध्या रा. कळंबोली, मुंबई, मुळ रा. आझमगड, राज्य उत्तरप्रदेश) यांस विकले असल्याचे सांगितले आहे. तसेच आरोपीने गुन्हयात वापरलेले वाहन स्कॉपिओ वाहन क्र. एम. एच. १६/अ.जी. ४०४४ तसेच सदर गुन्हयातील केन विकलेल्या पोटी आलेले ४० हजार रूपये असा एकुण १ लाख ४० हजार रुपये किंमतीचा मुद्देमाल पोलीसांनी हस्तगत करून ती जप्त केली आहे.

सदरची कामगिरी पुणे ग्रामीण चे पोलीस अधिक्षक अंकीत गोयल, अप्पर पोलीस अधिक्षक मितेश घट्टे, उपविभागीय पोलीस अधिकारी मंदार जवळे यांच्या मार्गदर्शनाखाली पोलीस निरीक्षक यशवंत नलावडे यांनी दिलेल्या सुचनांप्रमाणे सहाय्यक पोलीस निरीक्षक सुनिल बडगुजर, पोलीस उपनिरीक्षक अनिल पवार, विनोद गायकवाड, नरेंद्र गायकवाड, भिमा लॉढे, संजय शिंगाडे, पंकज पारखे, अगित माकुंजे, नवीन अरगडे, हनुमंत ढोबळे, प्रशांत तांगडकर यांनी केली आहे.