जुन्नर तालुक्यातील ‘या’ सहकारी पतसंस्थेत २ कोटी ८५ लाख रुपयांची अफरातफर;संचालक,व्यवस्थापकासह १४ जणांवर गुन्हा दाखल

आळेफाटा दि.२२:- बोरी बुद्रुक येथील प्रगती ग्रामीण बिगरशेती सहकारी पतसंस्थेच्या तत्कालीन संचालक मंडळावर २ कोटी ८५ लाख ४६ हजार ८९६ रुपयांचा अफरातफर केल्याप्रकरणी आळेफाटा पोलिस स्टेशन मध्ये गुन्हा दाखल करण्यात आला असून या घटनेमुळे जुन्नर तालुक्यात खळबळ उडाली आहे.

याबाबत आळेफाटा पोलिस स्टेशन चे पोलिस निरीक्षक दिनेश तायडे यांनी दिलेल्या माहितीनुसार बोरी बुद्रुक (ता.जुन्नर) येथील प्रगती ग्रामीण बिगरशेती सहकारी पतसंस्था मर्या.या संस्थेचे सन २०१६ ते २०२२ या कालावधीत असलेले तत्कालीन संचालक मंडळ व व्यवस्थापक यांच्यावर गुन्हा दाखल करण्यात आला आहे.सन २०१६ ते २०२२ या कालावधीचे वैधानिक लेखापरिक्षण करण्यासाठी सहा निबंधक, सहकारी संस्था, जुन्नर यांनी प्रमाणित लेखा परिक्षक संतोष दशरथ बांगर यांची नियुक्ती केली होती. त्यानुसार पतसंस्थेचे सन २०१६ ते २०२२ या कालावधीचे वैधानिक लेखापरिक्षण करीत असताना. सदर कालावधीमध्ये संस्थेचे तत्कालीन संचालक मंडळ १) संदिप कि. कोरडे, २) रमेश हनुमंत जाधव, ३) कै. राजेंद्र नारायण घोलप (मयत ), ४) चंद्रकांत देवराम जाधव, ५) राम वसंत बढे, ६) बन्सी नाथा कोरडे, ७) खंडेराव जानकु कोरडे, ८) संजय दशरथ जाधव, ९) अविनाश मनोहर गुंजाळ, १०) संजय पांडुरंग हलकरे, ११) सुशिला भिकाजी जाधव, १२) अरूणा सुरेश जाधव सर्व रा.बोरी बु। ता. जुन्नर जि.पुणे व तत्कालीन व्यवस्थापक १३) संतोष ज्ञानदेव साबळे, १४) रितेश सोपान पानसरे दोघे रा. साकोरी ता.जुन्नर जि.पुणे यांनी संगनमताने ठेवीदारांच्या खात्यामध्ये चुकीच्या नोंदी व रोजकिर्दला चुकीचा जमा खर्च करून. गैरव्यवहार व अपहार केलेला आहे. सहकार कायदा, कानून व पोट नियमांचे उल्लंघन केलेले आहे. तसेच संस्थेची चुकीची आर्थिक पत्रके तयार करून संस्थेची खरी आर्थिक परिस्थिती दडवून, चुकीचे वार्षिक अहवाल तयार करून, नियमबाहय बोगस कर्ज वितरण करणे, बँकेच्या ठेवी परस्पर काढून त्याची विल्हेवाट लावणे. वार्षिक सभा व मासिक सभा इतिवृत्तांत नोंद वहया ठेव खतावणी, कर्ज खतावणी, सभासद कर्ज अर्ज, सभासद कर्ज प्रकरणे तपासणीसाठी लेखापरिक्षणास सादर न करणे तसेच यामध्ये २ कोटी ८५ लाख ४६ हजार ८९६ रुपयांचा गैरव्यवहार करून अफरातफर व फसवणुक केल्याचे आढळून आल्याने तत्कालीन संचालक मंडळ व व्यवस्थापक यांच्यावर गुन्हा दाखल करण्यात आला आहे. या संदर्भाची फिर्याद लेखा परीक्षक संतोष दशरथ बांगर यांनी दिली आहे. पुढील तपास पोलीस निरीक्षक दिनेश तायडे यांच्या मार्गदर्शनाखाली सहायक पोलिस निरीक्षक अमोल पन्हाळकर हे करत आहेत.