आष्टीमधील भोसले गँगवर मोक्का

आष्टी दि.२१:- सरपंच संतोष देशमुख हत्या प्रकरणानंतर वाल्मीक कराड, सुदर्शन घुले, आठवले गँग, यानंतर आता आष्टीच्या भोसले गँगवर मोक्का लावण्यात आला आहे. मागील दोन महिन्यांत अशा प्रकारच्या तीन कारवाया केल्याने गुन्हेगारांचे धाबे दणाणले आहे. विशेष म्हणजे आतापर्यंत पहिल्यांदाच मोक्कामध्ये महिलांचा आरोपी म्हणून समावेश झाला आहे. एकप्रकारे पोलीस अधीक्षक नवनीत काँवत हे गुन्हेगारांसाठी कर्दनकाळ ठरत आहेत.आष्टी तालुक्यातील हातोळण येथील अजिनाथ भोसले, भरत भोसले या दोन सख्ख्या भावांचा खून करून कृष्णा भोसले याला गंभीर जखमी केल्याची घटना १६ जानेवारी २०२५ रोजी वाहिरा येथे घडली होती. याप्रकरणी अजिनाथची पत्नी चिब्बा (वय ३०) हिच्या फिर्यादीवरून अंभोरा ठाण्यात ९ जणांविरोधात गुन्हा दाखल झाला होता. पोलिसांनी यातील सहा आरोपींना अटकही केली. त्यानंतर अंभोरा पोलिसांनी या सर्व आरोपींच्या गुन्ह्यांची माहिती काढून मोक्काचा प्रस्ताव तयार केला. हा प्रस्ताव १० मार्च रोजी पोलीस अधीक्षक नवनीत काँवत यांच्याकडे पाठविण्यात आला. त्यांनी दुसऱ्याच दिवशी तो शिफारशीसह छत्रपती संभाजीनगरचे विशेष पोलीस महानिरीक्षक वीरेंद्र मिश्र यांना पाठवला. त्यांनी १९ मार्च रोजी याला मंजुरी दिली आहे. त्याप्रमाणे आता पहिल्या खुनाच्या गुन्ह्यात मोक्काचे कलम वाढविण्यात आले आहे. याचा पुढील तपास आष्टीचे उपविभागीय पोलीस अधिकारी बाळकृष्ण हनपुडे हे करत आहेत.