सुरेश धस यांनी उल्लेख केलेली बडी मुन्नी कोण? प्रश्न विचारताच उपमुख्यमंत्री अजित पवार संतापून म्हणाले, असल्या फालतू गोष्टी….

पुणे दि.१०:- बीडच्या मस्साजोगचे सरपंच संतोष देशमुख यांचं अपहरण करून त्यांची हत्या करण्यात आली, संतोष देशमुख यांच्या हत्येनंतर राज्यातील वातावरण चांगलंच तापलं आहे, या प्रकरणात सुरुवातीपासूनच भाजप आमदार सुरेश धस यांनी आक्रमक भूमिका घेतली आहे.

दररोज सुरेश धस यांच्याकडून या प्रकरणात नवे आरोप करण्यात येत आहेत, सुरेश धस यांनी या प्रकरणावर बोलताना आता बडी मुन्नीचा उल्लेख केला आहे. मात्र ही बडी मुन्नी नेमकी कोण आहे? हे अद्याप समोर आलेलं नाही? यावर बोलताना उपमुख्यमंत्री अजित पवार चांगलेच संतापले, ते पुण्यात आयोजित पत्रकार परिषदेमध्ये बोलत होते.

सुरेश धस यांनी या प्रकरणावर बोलताना बडी मुन्नीचा उल्लेख केला होता. त्यानंतर ही बडी मुन्नी नेमकी कोण आहे? यावर चर्चा सुरू झाली. याबाबत अजित पवार यांना प्रश्न विचारला असता ते चांगलेच संतापले. हे त्यांनाच विचारा, ते जर असल्या फालतू गोष्टी बोलत असतील तर मी आता नाव घेऊन बोलणार आहे. असं अजित पवार यांनी म्हटलं आहे. त्यामुळे हे त्यांनाच विचारा असं अजित पवार यावेळी म्हणाले. सुरेश धस यांनी असा उल्लेख केला होता की, राष्ट्रवादीत मुन्नी आहे. राष्ट्रवादीत एक वरिष्ठ मुन्नी आहे. राष्ट्रवादीत एक बडी मुन्नी आहे आणि त्या मुन्नीला म्हणा तू इथे ये. मिटकरी, सुरज चव्हाण या लहान पोरांना बोलायला लावते. मला माहिती आहे आणि मुन्नीला माहिती आहे, मी कोणाबद्दल बोलत आहे. सुरेश धसांच्या या विधानानंतर विविध चर्चा रंगताना दिसल्या. आता सुरेश धस यांच्या या मुन्नीच्या विधानावर उपमुख्यमंत्री अजित पवार हे चांगलेच संतापले.तसेच पत्रकारांनी त्यांना मंत्री धनंजय मुंडे यांच्या राजीनाम्याविषयी विचारले. यावर अजित पवार म्हणाले, “संतोष देशमुख हत्या प्रकरणाचा विविध तपास यंत्रणा तपास करत आहेत. त्याच्यबरोबर मुख्यमंत्र्यांनीही सांगितले आहे, या प्रकरणात कोणी दोषी असल्याचे सिद्ध झाले तर त्याच्यावर तातडीने कारवाई केली जाईल. मी सुद्धा देवेंद्र फडणवीस यांना भेटून सांगितले आहे की, पक्ष वगैरे न बघता यामध्ये वरिष्ठ पातळीवर काम करणारे कोणी दोषी असतील तर त्यांची गय करण्याचे कारण नाही. ही क्रूर पद्धतीने झालेली हत्या आहे. अशा प्रकारच्या घटना आम्ही खपवून घेणार नाही.” अशी प्रतिक्रिया अजित पवार यांनी दिली. त्यानंतर या प्रकरणावर सातत्याने भाष्य करणाऱ्या सुरेश धस यांच्या एका उल्लेखाबाबत विचारलं असता अजित पवार यांनी उत्तर दिलं आहे.