सह्याद्री व्हॅली कॉलेजमध्ये ‘वृक्षारोपण मोहीम’ उत्साहात संपन्न

राजुरी दि.३:-सह्याद्री व्हॅली कॉलेज ऑफ इंजिनिअरिंग अँड टेक्नॉलॉजी राजुरी (ता.जुन्नर) मध्ये पर्यावरण संवर्धन आणि हरित परिसराच्या निर्मितीसाठी भव्य वृक्षारोपण कार्यक्रमाचे आयोजन करण्यात आले होते. ‘हरित वसुंधरा’ या संकल्पनेवर आधारित ही मोहीम कॉलेजच्या राष्ट्रीय सेवा योजना (NSS) आणि डिपार्टमेंट ऑफ आर्टिफिशियल इंटेलिजन्स अँड मशीन लर्निंग आणि अभियांत्रिकी पदविका यांच्या संयुक्त विद्यमाने पार पडली.यावेळी महाविद्यालयाचे प्राचार्य, सर्व प्राध्यापक आणि विद्यार्थ्यांनी मोठ्या उत्साहाने सहभाग घेतला. या मोहिमेअंतर्गत कॉलेज कॅम्पसमध्ये विविध प्रजातींची १०० हून अधिक रोपे लावण्यात आली. यात प्रामुख्याने औषधी वनस्पती, फळझाडे आणि सावली देणाऱ्या झाडांचा समावेश होता.पर्यावरणाचा संदेश कार्यक्रमाच्या सुरुवातीला संस्थेचे खजिनदार सचिन चव्हाण यांच्या हस्ते वृक्षारोपण कार्यक्रमाचे उद्घाटन करण्यात आले. महाविद्यालयाचे कॅम्पस डायरेक्टर पी.बलरामडू यांनी उपस्थितांना मार्गदर्शन केले. “आजच्या धावपळीच्या जीवनात पर्यावरणाचे रक्षण करणे ही काळाची गरज आहे,” असे मत त्यांनी व्यक्त केले. “आपल्या परिसराला सुंदर आणि आरोग्यदायी बनवण्यासाठी प्रत्येकाने किमान एक झाड लावून त्याचे संगोपन करण्याची शपथ घ्यावी.”यावेळी विद्यार्थ्यांनी केवळ रोपे लावली नाहीत, तर भविष्यात त्यांची काळजी घेण्याची आणि कॉलेजचा परिसर हिरवागार ठेवण्याची प्रतिज्ञाही घेतली. अनेक विद्यार्थ्यांनी स्वयंस्फूर्तीने वृक्षारोपणाचे महत्त्व सांगणारे फलक आणि घोषणा तयार केल्या होत्या. या यशस्वी मोहिमेमुळे सह्याद्री व्हॅली कॉलेज ऑफ इंजिनिअरिंग अँड टेक्नॉलॉजीने पर्यावरण स्नेही शिक्षण संस्था म्हणून आपला ठसा अधिक गडद केला आहे.

या उपक्रमाने कॅम्पसमधील इतरांनाही वृक्षारोपण आणि निसर्ग संवर्धनासाठी प्रेरित केले आहे. या कार्यक्रमाचे नियोजन प्रा.उद्धव भारती, प्रा.कविता खेमनर, प्रा. वैभव नांगरे, प्रा.पानसरे, प्रा.गुंजाळ, प्रा.मणियार, प्रा.चौगुले, प्रा.साळुंके यांनी केले.